Det er ein stor dag for Eid fotball, som skal spele 1.runde i cupen for første gong sidan 1990. Den gongen var det Volda som var motstandar og stakk heim over fylkesgrensa med avansement til 2. runde. I dag er det ei enda større utfordring frå Sunnmøre som står på andre halvdelen med eliteserielaget Aalesund som motstandar. Sist desse laga duellerte var heilt tilbake i 1980, då Aafk blei grundig slått med 0-4 på Eid stadion. Det året gjekk Eid heilt til tredje runde i NM, der Molde med ein ikkje ukjent Åge Hareide på laget blei for sterke.

Heimelaget Eid har starta sesongen i Kretsligaen relativt bra og ligg på 3. plass på tabellen, fortsatt ubeseira på heimebane. Gutane i gult og svart stiller topp motiverte og omtrent fulltallige til dagens duell mot Aafk. Midtbanemotor Marius Henriksen og den hardtspelande Håvard Holmøyvik er usikre, men elles skal laget vere på topp og ekstremt klare til kampen.

Aalesund har absolutt ikkje fått ein god start på sesongen. Det har vore tidenes verste sesongstart i Eliteserien med blant anna 4 strake bortetap og 0-9 i målforskjell ute på tur. Etter at trenar Lars Arne Nilsen blei sendt ut dørene har Balestrands nest største son Marius Bøe teke over roret og i sist heimekamp fekk laget ein svært etterlengta opptur med 3-1 mot naborival Molde. Det er ein tropp med nyvunnen sjølvtillit som tek turen til Eid, og sjølv om nokre av dei faste førstelagsspelarane manglar er det eit sterkt lag som vil gå utpå grasmatta på Eid stadion i dag. Blant fråvera er keeper Sten Grytebust, kaptein David Fällman, talentfulle NIkolai Hopland, Alexander Munksgaard og Kristoffer Barmen.

Dommar i kampen er talentfulle Jonas Mossestad frå Førde IL. Han har med seg Kjell August Ytre-Eide frå Stryn og Andreas Bakkelid frå Sandane som assistentar på linjene, i tillegg til rutinerte Yngve Håkonsen frå Fjøra FK som fjerdedommar.

Trekkfullt på Eid i dag, men vi får håpe vinden ikkje påvirkar spelet nevneverdig. Grasmatta ser fin og grøn ut, men for Aafk vil dette nok minne meir om gamle Kråmyra enn stoveteppet heime på ColorLine. Kanskje kan det vere ein bitteliten fordel for heimelaget?

Snaue to timar til kampstart. Sola skin på Eid stadion. Dei frivillige er i full gang med siste finpussen på rigginga. Kultursjefen dundrar i gang lydsjekk som det luktar godstemning og fotballfest av. Materialforvaltar Marius Henriksen har briljert med Omo Color og draktbretting i heimegarderoben. A-laget er iallfall i dei beste hender der.

Gjestane frå jugendbyen er komne til bygda og er ute og inspiserer grasmatta på stadion. Speakerbua leskar seg med Oskar Sylte, berre for å sympatisere litt med Molde som blei slått av Aafk sist.

Speaker er i full gang med å fyre opp publikum før kamp i det spelarane varmar opp til tonane av dei lokale Svelekameratane. Småsurt ute på bana med en lett bris og duskregn i lufta

For dei lokale gutane på Eid er dette både 17. mai og julafta på ein gong. To lokale skulekorps marsjerer inn for å sette ein spiss på oppladninga før kamp. Skikkelig cupfest på Nordfjordeid!

Aafk-trenar Marius Bøe har mønstra eit solid lag i dag. Fokuserer på å gjennomføre ein profesjonell kamp og bygge vidare på godkjensla frå Moldekampen. Nordfjordingane håpar å gi den godkjensla ein liten støkk.

Uansett resultat i dag, Eid fotball leverer iallfall til toppkarakter på arrangement. Flott publikumoppmøte og ei strålande ramme rundt kampen. Fanfaren rungar utover stadion og laga marsjerer inn gjennom ei flaggborg av gule Eid-flagg.

Laga har unnagjort Fair Play-helsinga og den obligatoriske gruppeklemmen, så no ventar vi berre på at dommar Mossestad skal blåse igang kampen

Vi er i gang. Aalesund i kvitt tek avspark.

Eid pressar Aafk til kampens første glipp. Vinn innkast på Aafk sin halvdel.

Eid står høgt og prøvar seg i åpningsminutta. Beitveit med ein klassisk sleiv

Aafk med kjempesjanse, men Sindre Årskog vartar opp med ei kjempetakling

Ny enorm sjanse til Aafk, men Frislid med eit tigersprang får avverga. Eid får ein jobb med å ri av opningsstormen her.

Hjørnespark til Aafk. Innoverskrudd i feltet. Felde får til slutt brote og set fart framover. Pasninga dessverre utan adresse.

Eid pressa kraftig bakpå. Gjestane frampå nok ein gong, men puslete avslutning rett på keeper Frislid.

Karlsbakk finn Kitolano på venstrekanten. Kristian Årskog spelar vegg med Aafk-vingen og vinn innkast for Eid.

Moses kjem fri på høgresida og slår eit godt innlegg framfor mål. Atanga skal score, men Frislid klarer på mirakuløst vis å slå den over. Knallstart for Eid-keeperen.

Murray på tur på høgrekanten. Finn Lunding i feltet som dreg seg forbi eit par spelarar og går i bakken. Dommar ser ut til å skulle blåse straffe, men heldigvis for Eid ombestemmer han seg.

Eid blir pressa bakpå, men forsvarsfiraren har stått godt i mot så langt. Moses forsøker lure Felde, men får berre ein corner.

Nesten for Eid, som vinn corner etter litt rot i Aafk-forsvaret.

Aafk får heada unna, men Simen Lefdal snappar den frie ballen. Kristian Årskog blir spelt igjennom av et Aafk-bein og får avslutta, men til side for mål.

Assistentdommar hadde flagga for offside i den situasjonen, men det såg ut til at ballen kom frå ein kvitkledd.

Sindre Årskog har herja på venstrebacken, slår ein flott crossar til bror Kristian. Aafk klarer å få ballen ut til innkast.

Eid litt meir med på notane ein kort periode no. 1-0 er en dobbelt så farlig ledelse som 2-0

Ny corner til Aafk. Henning Haugen får avverga med en klassisk drylar.

Kristian Lefdal finn bror Simen som har Joakim Vedvik åleine framfor mål. Blir sprunge opp av Aalesundforsvaret. Der kunne Eid fått en kjempemulighet.

Vedvik vinn ball i duell med Murray, som må bruke ulovlige midlar for å stoppe stjernefotografen og storscoraren .

Murray har vaska fotballskoa med zalo i dag, fleire glepp i mottaka.

Felde med kampens fjerde kanontakling på høgrebacken. Må ikkje briljere meir no, elles tek han snart plassen til Murray på Aalesund.

Karlsbakk blir sett godt under press av Beitveit og Vedvik, men klarer å sno seg ut av floka. Gjestane bygger opp på nytt, men blir nok ein gong hindra av Sindre Årskog. Backane til Eid har vore gode så langt.

Vedvik forsøker lure to Aalesundforsvararar, men møter veggen. Positive tendensar frå heimelaget.

Flatebø stoppar ein farlig overgang, men spelar vekk ballen igjen. Aafk får til slutt avslutta, men Frislid nok ein gong nede med ei fin redning.

Beitveit stussar gjennom til mannen som aldri sluttar å springe, Kristian Årskog. Aafk-keeper blir skremt av klyva til Eidvingen og spelar ballen ut til kast.

Lundin blir spelt fri på høgrekanten, dreg seg inn i feltet og sender avgårde eit skot som får dei lokale golfarane til å rope "fore"

Flatebø jevnar Kitolano med jorda med ei plogtakling, eit lokalt kjennemerke frå Voss. Reint på ball.

Murray med skotforsøk, men ikkje heilt innstilt sikte og til side for mål.

Glimtvis ser ein ganske tydelig at det er nokre divisjonar i forskjell på laga. Er litt høgare tempo på ball, meir presisjon og smartare valg av eliteserielaget. Likefullt har ikkje Eid gjort seg vekk her.

Aafk spelar seg til eit nytt hjørnespark. Lundin skrur utover i feltet, men denne gongen får Eid heada unna.

Atanga igjennom, men Frislid stuper ut og stoppar kantspelaren.

Eid får frispark inne på Aalesund sin halvdel. Beitveit skal slå inn i feltet.

Balsnes som vanlig høgast i feltet og får heada mot mål, men like utanfor. Kampens største sjanse til Eid.

Edderkoppen Felde med trippeltakling. Får litt merkelig nok frispark mot seg. Aalesund med forsøk frå rundt 30 meter.

Dommaren bles av første omgang. Aalesund går til pause med ei oppskriftsmessig leiing etter ein dominant omgang mot eit hardtkjempande heimelag.

Solid oppmøte på stadion i ruskeveret i dag. Ca 1400 tilskodarar er i høgste grad respektabelt. Straks klare med andre omgang.

Eid startar andreomgangen. Flatebø forsøker ei langpasning mot Vedvik, men litt for lang.

Segberg viser korleis ein slår crossballar og sender ei strøken pasning ut til Murray. Endar med hjørnespark

Innlegget blir tatt av vinden og går over alt og alle.

Karlsbakk med skotforsøk, men har for mykje stein i ryggsekken og skotet går over mål.

Atanga tek med Balsnes på karuselltur.

Eid sliter med å etablere spel, noko som forsåvidt ikkje er rart med tanke på motstanden.

Ein småfrustrert Lundin får tilsnakk av dommar etter ein ettersleng. Hindrar Eid å sette i gang eit angrep, så ein kunne kanskje sett på kortstokken der

Aafk kjem i hundre igjen. Atanga spelt fri framfor mål, men avsluttar over.

Eid frampå. Simen Lefdal forsøker spele fri Kristian Årskog, men pasninga blir litt for svak.

Eit par seine taklingar frå Aafk no. Eid har på ein eller anna måte klart å fyre opp sunnmøringane.

Balsnes sin tur til å finte ut to motspelarar. Eid meir med igjen.

Kristian LEfdal spelt igjennom, men blir sprunge opp av Juel

Holmøyvik markerer seg med ein gong med å vinne første duell i lufta.

Skikkelig ruskeveir i Nordfjord no. Til og med høgtalarane bles over ende.

Holmøyvik tek sats og taklar ballen via Kitolano og til kast for Eid. Kitolano blir sittande nede.

Lundin forsøker skru den i mål, men Frislid er godt med på notane og reddar igjen.

Vedeld fri på høgrekanten og får lagt inn i feltet. Kristian Årskog snappar ballen framfor Aafk-forsvaret, men det ebbar ut i ingenting

Simen Lefdal svevar over grasmatta og forserar framover. Blir stoppa av ein Aafk-arm og får frispark.

Åsebø slår inn mot feltet. Litt for kort. Eid prøver å bite seg fast, men har ikkje sterke nok tenner.

Godt gjennomspel mot Vedvik og Vedeld, men keeper Lansing har ikke begynt å dagdrøyme om laksefiske i Eidselva eller Jugendfest, så han er vakent ute og får klarert.

Kristian Årskog får et lite anfall av Messi og vartar opp med nokre lekre touch på høgrekanten.

Eid nære på scoring! Sindre Årskog millimeter for sein på innlegg frå Vedvik.

Sindre Årskog og Kolve kjempar om ball. Eliteseriespelaren går sigrande ut.

Ny duell like etter. Frispark til Eid. Åsebø slår inn igjen, men Aafk får heada unna nok ein gong.

Beitveit finn Vedeld, men den unge spissen låg på feil side av offsidelinja

Positiv andre omgang av Eid. Aafk har nok sett på cruisekontrollen, men ein ser på engasjementet at konkurranseinstinktet framleis lever.

La akkurat merke til at Aafk-supporterane gikk i ett med refleksvestane til dei frivillige frå Røde Kors. Klart fleirtal av heimefans i dag, sjølvsagt .

Frislid nok ein gong nede med ei fin reaksjonsredning.

Eid forsøker sette dei kvite tangotrøyene under press. Sindre Årskog er litt for seint ute og lagar frispark.

Eid-keeper Frislid fortjent kåra til dagens beste på heimelaget, i skarp konkurranse med backane.

Vedeld med ei dragning som sender Berntsen på ræva. Går innover i feltet, men blir stoppa av Aafk-forsvaret til slutt.

Årskog spelt fri og forserer inn i feltet, men sklir før han får avslutta.

Felde sklir og held på å bli runda av Berntsen, men klarer komme seg på beina igjen og få inn nok ei takling. Hjørnespark til Aafk.

Beitveit headar unna. Eid forsøker sette opp et siste angrep.

Då bles dommaren av kampen. Sjølv om det vart eit tap for heimelaget i dag, så kan dei reise heim med hovudet heva. Motstanden vart for sterk, men laget la ned ein solid innsats. Aafk tek med seg årets første borteseier og sjølvtillit vidare til nye utfordringar i Eliteserien, så det blir spennande å sjå om trenar Bøe får fortsette å bygge samhold og samspel i øverste divisjon. Eid får besøk av Studentspretten til helga og kan komme tilbake på seierssporet på heimebane då.